記事

Don’t give up

破例出ÖZIL著阿仙奴嘅相,因為今日發生咗件事今我好心噏,又好感動。

今日返舖,有個頗為瘦削嘅男仔嚟買新一季嘅阿仙奴波衫印ÖZIL。佢等我印緊字嘅期間,問完舊德國印字,又走去睇啲皇家馬德里嘅舊衫,心諗而家啲後生仔咁有錢嘅。

咁通常我埋機位印字,就老細招呼啲客同收錢㗎啦,佢就問下佢:「咦,你德國fan嚟㗎?」個男仔就話:「正確嚟講係ÖZIL fan。」跟住佢就繼續問件舊皇馬有冇細碼,因為佢都幾瘦,老細就話冇啦,得返中碼啫,佢望兩望,就話:「中碼都著到嘅,鬆啲啫,唔買唔知仲有冇機會買㗎啦。」咁我同老細好好奇,就問佢:「點解講到咁灰嘅呢?」然後個男仔就話:「暴動罪,坐十年㗎。」

我同老細當時打咗個突,個男你開始講佢故仔:「其實呢,示威嗰陣我上前線嘅,如果拉咗,可能就要坐十年。我儲咗舊錢,本嚟唔捨得用,但而家唔用唔知仲有冇機會用,咪買下自己鍾意嘅嘢囉。」

我當刻呆咗,好想喊,點解一個望落去可以做我個仔嘅男仔,一個瘦弱嘅身軀,可以講啲咁老成嘅說話,點解佢可以咁有勇氣去前線頂住班濫權嘅警察同黑社會。

老細問佢,屋企人會唔會反對佢上前線,佢話:「阿媽話支持,但都係唔想我出去㗎啦,就算去,自私啲都會講叫我唔好上咁前。」「咁老豆呢?」老細問。「老豆話中立囉,但又係阻住佢開工佢咪會鬧囉。好似8月5嗰日咁,因為佢做嘅工找現嘅,開唔到工,佢開唔到工,咪嘈。」男仔無奈咁講。

「我已背上一身苦困後悔與唏噓,你眼裡卻此刻充滿淚,這個世界已不知不覺的空虛,WOWOW⋯⋯不想你別去。」當下播住beyond首《灰色軌跡》,真係無盡嘅唏噓。真真正正感受到,乜嘢係一個都不能少,香港有呢班後生仔,其實香港人真係好幸福。

「無㗎啦,你唔出嚟,唔知幾時仲可以出嚟,個個星期出嚟係攰㗎,所以呢兩日冇event,咪出嚟買下嘢,遲啲都唔知仲有冇機會買,有冇機會用錢。」男仔一路講,我個心一路嗱住,其實勁嬲。點解連班細路都明嘅道理,班老屎忽仲可以埋沒良知?個政府仲可以不聞不問?班警察點解可以扑得落手?

沉默咗兩秒,老細就同佢講:「傻啦,唔好咁諗,好多謝你幫我哋同香港人上前線,但都要自己保重。」然後老細俾咗個唔細嘅discount佢,叫佢加油。臨走前,仲塞咗罐汽水過佢,佢竟然話唔好意思收。老細話:「請你飲呀,有乜嘢想呻又冇地方呻,即管上嚟,大把人聽你講,我哋counter啲位係俾人坐嘅。」我補多句:「我哋呢度係咁,行街攰就上嚟飲嘢,下次要再見你。」男仔好禮貌咁同我哋say goodbye,門一關上,我嘆咗口大氣。

要鬧嘅,要講嘅,其實都講過,當自己唔再年輕,走唔郁,有負擔,你就更加覺得世代真係會淘汰你。我哋可以做嘅,就係支持佢哋,理解佢哋點解要咁做,而唔係鬧佢哋阻住搵食。有班老屎忽仲話佢哋被人煽動,有大台,有外國勢力,被人利用,背後其實驚嘅係,自己被呢個世代淘汰。2014年我講過,今日再講,世代之爭係難以避免,點解叫「光復香港,時代革命」,正正就係上一代人剝奪緊新一代人嘅權益,所以時代要變,唔同世代嘅人點樣共存共榮,而唔係好似葉國謙、葉劉淑儀之流咁講廢話,阻住個地球轉。

男仔,記住不受傷、不被捕,一個都不能少,我等你再返嚟買波衫,搵定啲ÖZIL等你返嚟,一定要返嚟呀!